بالاجا قارا بالیق

بالاجا قارا بالیق بیر نئچه گون ایدی فیکیره دالیر، آز ‌دانیشیردی. کؤنولسوز و تنبل-تنبل او طرف-بو-طرفه گئدیر، گئری قاییدیردی. چوخ واخت آنا‌سین‌دان خئیلی گئری قالیردی. آناسی اولجه، بالاسینین بیراز کئفسیز اولدوغونو سانیردی. بو کئفسیزلیک تئزلیکله کئچیب گئده‌جک‌دیر. لاکین… دئمه، بالاجا بالیغین دردی واریمیش…

من آرتیق بئله گزمه‌یی ایستمیرم. بو آرخدان گئتمه‌لییم، دئدی آناسینا... ایسته‌ییرم، گئدم گؤروم، آرخ هارادا سونلانیر؟ دونن گئجه‌دن بری گؤزلریمی یومماییب هر شئیی فیکیرلشمیشم. اوزوم گئدیب آرخین سونونو تاپمالییام... حیاتین بو بیر قاریج یئرده دولانیب قاییداراق، هئچ بیر شئی گؤرمه‌دن یاشلانیب اؤلمکدن می عبارت اولدوغونو، یوخسا باشقا بیر دونیانین دا اولوب اولمادیغینی بیلمک ایسته‌ییرم.

بالاجا قارا بالیغین آناسی، باشقا دونیا! باشقا دونیا!من ده اوشاق اولاندا بئله فیکیر‌له‌شردیم، بالاجان! آرخین نه اولی وار، نه آخیری. ائله گؤردویون نه وارسا اودور. آرخ همیشه آخیر، سونو یوخدور. اؤته‌ده تهلوکه/خطر وار، گئدرسن یئم اولارسان بؤیوک بالیقلارا، آغیلسیزجا داورانما.

بالاجا بالیق دنیزی دوشونوردو. دنیزه وارماغی آماجلامیشدی. اونا گؤره یاشاماق یالنیزجا یئمک، یاتماق و آرخین کیچیک دونیاسیندا دولانیب قاییتماقدان عبارت دئییلدی. هر شئی گؤزه آلاراق آیریلار آرخدان، آناسیندان و تانیدیقلاریندان. دنیزه گئدن یولدا چئشیدلی خطرلرله، خیانتلرله و چتینلیکلرله قارشیلاشار. بونلاری آشماغین یوللارینی تاپار، یئنی شئی‌لر اؤیرنر و یئنی دونیالار گؤرر. دنیزه وارار.
 

صمد بهرنگی (١٣١٨-١٣٤٦) قیسا یاشامیندا یوردونون کندلرینده معلم اولموش، خالق ناغیلاری و سؤیلنجه‌لری توپلامیشدیر. اوشاقلار اوچون یازدیغی اؤیکولرده/حکایه‌لرده باشقا بیر یاشام بیچیمینین مومکون اولدوغونو جانلاندیرماغا چالیشمیشدیر. اوخویوجولارینی؛ وئریلی اولان دَیرلری، بیچیملری، قبوللاری و محدودیتلری سورغولاماغا جسارتلندیرمه‌یه چالیشار.